1. Análise fílmica
Propoñémosche que analices un dos seguintes vídeos: Un caso aparte (EEI de Xustáns, Ponte Caldelas, gañador do premio Olloboi Orixinal 2015) ou Désprestige, DéseducAcción (IES A Cachada, gañador do premio Olloboi Peleón 2014).
A continuación da descrición dos vídeos, tés unhas preguntas que poden servirche de guía.
Un caso aparte é un traballo elaborado por Iago Manoel Souto en homenaxe á escola unitario onde estudou, e que fechou as súas portas no curso 2015/16. A idea de Iago era crear unha historia cómica na que o alumnado desfrutase actuando pero sen complicacións de texto. Escribiu o guión pensando nos tiros de cámara e gravou en apenas dúas horas, xusto a tempo para exhibila ó día seguinte. Iago estudou o Grao de Comunicación Audiovisual e cos seus coñecementos sobre planos e montaxe, e unha ración de moi bo gusto, fixo un produto áxil e divertido, onde a música (CC) acompaña a acción e diferencia as distintas partes da trama: inicio, no e desenlace.
Désprestige, DéseducaAcción é un documental elaborado polo alumnado de 3º e 4º da ESO do IES A Cachada para dar testemuño dos actos de conmemoración do afundimento do Préstige en 2002. Para montar esta peza utilizaron entrevistas que gravaron ese mesmo día, imaxes de arquivo e unha gravación das escenificacións levadas a cabo en Laxe. Todo o material foi montado por unha alumna de 3º, Sara Hermo.
Cuestións guía para a análise
- A montaxe da peza que escolliches é de tipo narrativo (descrición lineal de secuencias) ou expresivo (non hai continuidade temporal na narración dos actos)? Por que cres que se escolleu este tipo de montaxe?
- A montaxe da peza que escolliches é de tipo analítico (ritmo externo ou uso de planos fragmentados) ou sintético (planos longos con ritmo interno)? Por que cres que se escolleu este tipo de montaxe?
- Percibes algunha elipse temporal? Con que recurso de montaxe se fai? Utilizarías ti o mesmo? Por que?
- Atopas algún recurso de manexo psicolóxico do tempo (silencios forzados, ritmo rápido, etc)?
- Todo o tempo existe sincronía entre a imaxe e o audio, ou non van xuntos en algún intre? A que achacas isto?
2. Creación
Como verás en todos os capítulos, de forma xenérica facémosvos a proposta de crear unha historia en torno ós mercados locais ou prazas de abastos. Nos mercados hai moitos recursos persoais e materiais que gravar, unha gran variedade cromática e un amplo rango dinámico de sons. As historias que xorden neste tipo de lugares poden ser útiles para tratar contidos de Historia e Xeografía (a evolución dos mercados nas nosas vilas), Economía e Matemáticas (as formas de comercio), Linguas (vocabulario relativo ós diferentes produtos en venta e os oficios), Ciencias e Tecnoloxía (a industria do frío, a fermentación de produtos, os métodos de transporte…), etc.
Se seguistes a orde que vos propoñíamos, no capítulo 6 (BSO) tivestes que saír gravar sons ó mercado ou feira e compuxestes unha pequena peza sonora. A nosa idea é que sigades o exemplo de Alfonso Merino na súa curta Música Doméstica, e que montedes unha peza creativa (é dicir, sen servidume por ningunha historia) e analítica (planos fragmentados e ritmo externo) a partir das gravacións realizadas ese día no mercado (para isto tivestes que ter recollido son e audio, evidentemente). Valorarase que os planos foran gravados cun sentido estético na súa composición, e que exista variedade de tamaños e angulacións cando sexa procedente.
Esa pequena montaxe será utilizada para os títulos de crédito da vosa curta ou como unha peza per se.